ວັນ​ທີ 13 ຕຸ​ລາ​ 2025, ທ່ານ ນາງ ປານີ ຢາທໍ່ຕູ້ ຮອງປະທານປະເທດ ເເຫ່ງ ສປປ ລາວ ພ້ອມດ້ວຍຄະນະຜູ້ເເທນ ໄດ້ເຂົ້າຮ່ວມກອງປະຊຸມຜູ້ນໍາໂລກ ວ່າດ້ວຍເເມ່ຍິງ ຢູ່ນະຄອນຫລວງ ປັກກິ່ງ, ສປ ຈີນ ຊຶ່ງໃນນັ້ນ ມີທ່ານ ສີ​ ຈິ້ນ​ຜິງ ປະ​ທານປະ​ເທດ​ຈີນ ​ໄດ້​ເຂົ້າ​ຮ່ວມ ກອງ​ປະ​ຊຸມ ​ສຸດຍອດ ​ແມ່​ຍິງ​ໂລກ ​ຢູ່​ສູນ​ປະ​ຊຸມ​ ແຫ່ງ​ຊາດ ​ທີ່​ນະ​ຄອນ​ຫລວງ​ ປັກ​ກິ່ງ​ ພ້ອມ​ທັງ​ ກ່າວ​ຄຳ​ປາ​ໄສ ​ພາຍ​ໃຕ້​ຫົວ​ຂໍ້ “ເສີ​ມ​ຂະ​ຫຍາຍ​ຈິດ​ໃຈ​ ກອງ​ປະ​ຊຸມ​ໃຫຍ່ ແມ່​ຍິງ​ໂລກ ​ປັກ​ກິ່ງ ເລັ່ງ​​ລັດ​ຂະ​ບວນ​ການ​ໃໝ່ ​ແຫ່ງ​ການ​ພັດ​ທະ​ນາ​ ແມ່​ຍິງ​ ຢ່າງ​ຮອບ​ດ້ານ”. ໃນໂອກາດນີ້ ທ່ານ ສີ ​ຈິ້ນ​ຜິງ ໄດ້ກ່າວ​ເນັ້ນ​ໜັກ​ວ່າ: ເມື່ອ​ແນມ​ເບິ່ງ​ອະ​ນາ​ຄົດ, ​ຝ່າຍ​ຕ່າງໆ​ ຄວນ​ທົບ​ທວນ​ຄືນ ​ຈິດ​ໃຈ​ ກອງ​ປະ​ຊຸມ​​ໃຫຍ່ ແມ່​ຍິງ​ໂລກ ​ທີ່​ປັກ​ກິ່ງ, ​ເຕົ້າ​ໂຮມ​ຄວາມ​ຮັບ​ຮູ້ ​ທີ່​ເປັນ​ເອ​ກະ​ພາບ​ກັນ ​ໃຫ້ກວ້າງ​ຂວາງກວ່າ​ເກົ່າ,​ ບຸກ​ເບີກ​ເສັ້ນ​ທາງ​ໃຫ້ກວ້າງ​ຂວາງກວ່າ​ເກົ່າ​ ແລະ​​ ໃຊ້​ການເຄື່ອນ​ໄຫວ​ ທີ່​ຕິດ​ແທດ​ຕົວ​ຈິງ ກວ່າ​ເກົ່າ ເພື່ອ​ເລັ່ງ​​ລັດ ​ຂະ​ບວນ​ການ​ໃໝ່​ ແຫ່ງ​ການ​ພັດ​ທະ​ນາ ​ແມ່​ຍິງ​ ຢ່າງ​ຮອບ​ດ້ານ. ທ່ານ ສີ ​ຈິ້ນ​ຜິງ ​ຍັງໄດ້​ສະ​ເໜີ​ 4 ຂໍ້​ສະ​ເໜີ ສຳ​ຄັນຄື: ​ໜຶ່ງ ຮ່ວມ​ກັນ​ສ້າງ​ ສະ​ພາບ​ແວດ​ລ້ອມ ​ອັນ​ດີ​ງາມ ​ທີ່​ມີ​ຜົນ​ປະ​ໂຫຍດ ​ຕໍ່ການ​ພັດ​ທະ​ນາ ​ແລະ ເຕີບໃຫຍ່ ຂອງ​ແມ່​ຍິງ, ສອງ ຮ່ວມ​ກັນ​ບົ່ມ​ເພາະ​ພະ​ລັງ​ແຮງ​ ທີ່​ເຂັ້ມ​ແຂງ​ ໃນ​ການ​ຊຸກ​ຍູ້​ ການ​ພັດ​ທະ​ນາ​ ທີ່​ມີ​ຄຸນ​ນະ​ພາບ​ສູງ​ ດ້ານ​ວຽກ​ງານ​ແມ່​ຍິງ, ​ສາມ ຮ່ວມ​ກັນ​ສ້າງ ​ສະ​ພາບ ​ການ​ປົກ​ຄອງ ເພື່ອ​ຮັບ​ປະ​ກັນ​ສິດ ​ແລະ ​ຜົນ​ປະ​ໂຫຍດ ຂອງແມ່​ຍິງ ແລະ ສີ່ ຮ່ວມ​ກັນ​ຂຽນປະ​ຫວັດ​ສາດ​ໜ້າ​ໃໝ່ ​ແຫ່ງ​ການຊຸກ​ຍູ້ ​ການ​ຮ່ວມ​ມື ​ຂອງ​ແມ່​ຍິງ​ໃນ​ໂລກ.

          ເນື່ອງໃນໂອກາດນີ້, ໃນວັນທີ 14 ຕຸລາ 2025, ທ່ານ ນາງ ປານີ ຢາທໍ່ຕູ້ ຮອງປະທານປະເທດ ເເຫ່ງ ສປປ ລາວ ພ້ອມດ້ວຍຄະນະຜູ້ເເທນ ໄດ້ສືບຕໍ່ເຄື່ອນໄຫວໃນໂອກາດເຂົ້າຮ່ວມກອງປະຊຸມຜູ້ນໍາໂລກ ວ່າດ້ວຍເເມ່ຍິງ ຢູ່ນະຄອນຫລວງ ປັກກິ່ງ, ສປ ຈີນ ໂດຍໄດ້ພົບປະສອງຝ່າຍກັບ ທ່ານ ຫານ ເຈິ້ງ ຮອງປະທານປະເທດ ເເຫ່ງ ສປ ຈີນ. ໃນນັ້ນ, ທ່ານ ນາງ ປານີ ຢາທໍ່ຕູ້ ໄດ້ສະເເດງຄວາມຂອບໃຈ ເເລະ ຕີລາຄາສູງ ຕໍ່ສາຍພົວພັນມິດຕະພາບອັນເປັນມູນເຊື້ອລະຫວ່າງສອງພັກ, ສອງລັດ ເເລະ ປະຊາຊົນ ລາວ-ຈີນ ລວມທັງຊົມເຊີຍຜົນສໍາເລັດອັນຍິ່ງໃຫຍ່ ຂອງ ສປ ຈີນ ໃນການຈັດກອງປະຊຸມຜູ້ນໍາໂລກ ວ່າດ້ວຍແມ່ຍິງ, ກອງປະຊຸມສຸດຍອດອົງການຮ່ວມມືຊຽງໄຮ້ ຄັ້ງທີ 25 ເເລະ ພິທີລະນຶກເຖິງວັນໄຊຊະນະຂອງສົງຄາມປະຊາຊົນຈີນ ຕໍ່ຕ້ານການຮຸກຮານຂອງຟາດຊິດຍີ່ປຸ່ນ ແລະ ຟາດຊິດໂລກ ຄົບຮອບ 80 ປີ ໃນເດືອນກັນຍາ 2025 ທີ່ຜ່ານມາ,​ ຊຶ່ງບັນດາກິດຈະກໍາດັ່ງກ່າວນີ້ ລ້ວນເເລ້ວເເຕ່ເປັນການສະເເດງໃຫ້ເຫັນເຖິງຄໍາໝາຍໝັ້ນ ແລະ ຄວາມພະຍາຍາມຂອງ ສປ ຈີນ ໃນການພັດທະນາ ແລະ ສ້າງສາໂລກຂອງພວກເຮົາ ໃຫ້ນັບມື້ນັບມີຄວາມຈະເລີນຮຸ່ງເຮືອງຂຶ້ນເລື້ອຍໆ ເເລະ ຫວັງວ່າ ສປ ຈີນ ຈະສືບຕໍ່ໃຫ້ການຮ່ວມມື ເເລະ ສະໜັບສະໜູນ ສປປ ລາວ ໃນດ້ານເສດຖະກິດ-ການຄ້າ,​ ການລົງທຶນ, ວັດທະນະທໍາ, ເຕັກໂນໂລຊີ, ການທ່ອງທ່ຽວ ລວມທັງທ່າແຮງຂອງ ເສັ້ນທາງລົດໄຟ ລາວ-ຈີນ ເພື່ອເປັນການກະກຽມໃຫ້ເເກ່ ສະເຫລີມສະຫລອງວັນຄົບຮອບການສ້າງຕັ້ງສາຍພົວພັນການທູດ ລາວ-ຈີນ ຄົບຮອບ 65 ປີ ໃນປີ 2026 ເຊິ່ງທັງສອງປະເທດຈະຮ່ວມກັນຈັດຕັ້ງປະຕິບັດ “ປີມິດຕະພາບ ລາວ-ຈີນ, ຈີນ-ລາວ 2026”. ໃນຕອນທ້າຍ, ທ່ານ ຮອງປະທານປະເທດ ເເຫ່ງ ສປປ ລາວ ໄດ້ຖືໂອກາດດັ່ງກ່າວເຊື້ອເຊີນການນໍາຂັ້ນສູງຂອງ ສປ ຈີນ ເຂົ້າຮ່ວມງານສະເຫລີມສະຫລອງ ວັນສະຖາປະນາ ສປປ ລາວ ຄົບຮອບ 50 ປີ ເພື່ອເປັນການສືບຕໍ່ຮັດເເໜ້ນສາຍພົວພັນມິດຕະພາບອັນເປັນມູນເຊື້ອລະຫວ່າງ ສອງ ປະເທດ.

          ທ່ານ ຫານ ເຈິ້ງ ຮອງປະທານປະເທດ ເເຫ່ງ ສປ ຈີນ ໄດ້ຕີລາຄາສູງຕໍ່ ການພົວພັນຮ່ວມມືສອງຝ່າຍ ຈີນ-ລາວ ໃນໄລຍະຜ່ານມາ ແລະ ການເຂົ້າຮ່ວມກອງປະຊຸມ ສຸດຍອດຜູ້ນຳໂລກ ວ່າດ້ວຍແມ່ຍິງ ຂອງຝ່າຍລາວ ໃນຄັ້ງນີ້. ສປ ຈີນ ຈະສືບຕໍ່ຮ່ວມມືກັບ ສປປ ລາວ ຕາມການຕົກລົງຂອງສອງປະເທດໃນຂອບສອງຝ່າຍ ແລະ ຈະສືບຕໍ່ຮ່ວມມື ໃນຂອບການຮ່ວມມືຫລາຍຝ່າຍ ຜ່ານລະບົບອົງການ ສະຫະປະຊາຊາດ, ຂອບ ອາຊຽນ-ຈີນ, ຂອບການຮ່ວມມື ແມ່ນ້ຳຂອງ-ແມ່ນ້ຳລ້ານຊ້າງ, ວຽກງານການແກ້ໄຂບັນຫາການປ່ຽນແປງດິນຟ້າອາກາດ ແລະ ອື່ນໆ. ພ້ອມທັງ ສະເໜີຝ່າຍລາວ ໃຫ້ການສະໜັບສະໜູນ ຂໍ້ລິເລີ່ມ ການປົກຄອງບໍລິຫານໂລກ (Global Governance Initiative) ຂອງ ທ່ານ ສີ ຈິ້ນຜິງ ປະທານປະເທດແຫ່ງ ສປ ຈີນ.

          ທ່ານ ຫານ ເຈິ້ງ ຮອງປະທານປະເທດ ເເຫ່ງ ສປ ຈີນ ໄດ້ຕີລາຄາສູງຕໍ່ ການພົວພັນຮ່ວມມືສອງຝ່າຍ ຈີນ-ລາວ ໃນໄລຍະຜ່ານມາ ແລະ ການເຂົ້າຮ່ວມກອງປະຊຸມ ສຸດຍອດຜູ້ນຳໂລກ ວ່າດ້ວຍແມ່ຍິງ ຂອງຝ່າຍລາວ ໃນຄັ້ງນີ້. ສປ ຈີນ ຈະສືບຕໍ່ຮ່ວມມືກັບ ສປປ ລາວ ຕາມການຕົກລົງຂອງສອງປະເທດໃນຂອບສອງຝ່າຍ ແລະ ຈະສືບຕໍ່ຮ່ວມມື ໃນຂອບການຮ່ວມມືຫລາຍຝ່າຍ ຜ່ານລະບົບອົງການ ສະຫະປະຊາຊາດ, ຂອບ ອາຊຽນ-ຈີນ, ຂອບການຮ່ວມມື ແມ່ນ້ຳຂອງ-ແມ່ນ້ຳລ້ານຊ້າງ, ວຽກງານການແກ້ໄຂບັນຫາການປ່ຽນແປງດິນຟ້າອາກາດ ແລະ ອື່ນໆ. ພ້ອມທັງ ສະເໜີຝ່າຍລາວ ໃຫ້ການສະໜັບສະໜູນ ຂໍ້ລິເລີ່ມ ການປົກຄອງບໍລິຫານໂລກ (Global Governance Initiative) ຂອງ ທ່ານ ສີ ຈິ້ນຜິງ ປະທານປະເທດແຫ່ງ ສປ ຈີນ.